利申: 不是影評, 只係睇過記錄低.
歡迎採用在其他媒體, 如真嘅俾面用了, 無言感激.
晶哥其實講多過做, 佢作品好聽叫樂而不淫, 啱聽嘅即係少少咸多多趣, 論重口味比之李安個色戒關錦鵬嘅愈墮落, 尤其蔡明亮作品差天同地, 呢套爛滾夫斗爛滾妻聽落意識上好勁, 但嗒落就知 講多過做, 開波無耐就經已要吃齋一百日, 唔係志蓮凈菀嗰D, 同彭導低俗實純情異拍即合.
捻落彭浩翔郭子健哥 呢停半新不舊導演無受晶哥影響係無可能嘅, 彭導友串情演順理成章理所當然.
講開又講, 叉開話題, 彭浩翔大導演未上位係亞視即係伊家靚仔高層有錢嘅人大把嘅個樹做趣劇, 經周不時幕前演出, 實情身經百戰, 之前春嬌到為答謝 fan屎都扮過一次玉女.
凡好導演不敢話十成, 九成都識做戲, 仲係做得好好, 成九日同AIRtist示范嘅, 徐克李翰祥杜SIR都個中高手, 鬼佬馬田生-翻拍無間道個位-都成日上鏡, 包括去後學波叔齣戲做番自己, 東瀛北野生鍋鍋都自導自演, 希治閣老Seefood更開創影史先河, 鋪鋪現身.
番轉頭, 爛滾夫妻大斗法, 片名呃人嘅, 佢兩個都未成親, 點係夫妻, 條數點計?回水!
好多人寫呢D, 硬係懶好心介紹一輪劇情, 我話多此一舉. 單刀直入, 兩個字, 一橫一豎, 娜姐腹肌好好睇啊! 汶澤個肚腩好好笑啊! 浩翔個鮑魚造型好型好COOL魔啊!!
劇情凈守身如玉一百日都夠嗮出位, 仲要晚晚對住魔鬼身材天使面孔嘅周小姐, 點忍啊? 跟開晶哥嘅人未卜先知, 咁先有笑位, 肥杜 (先過幾個月再咁叫佢就OUT佢已玉樹林峯啦) 扮鬼扮馬, 七情上面, 暴發戶扮二世祖, 實情過盡千帆, 經已想收心養性嘅情長劍, 無風無浪到終點, 童菲純粹花樽咁擺下, 俾多少少著數我地D咸濕仔叫做少D投訴無嘢睇.
娛樂片美術攝影要求可以松手小小, 呢部做得幾好啊, 音樂順耳, 仲想點.
為咗迎合低俗主流, 以前用諧音粗粗地過骨嘅十八字依家梗係打正旗號用正音講, 因此被評三級求仁得仁, 呢個係賣點, 正正係要俾人知有爆, 爆粗後果就是爆紅, 同社會現實接軌, 正正表達咗一種後現代嘅憤怒同對射會嘅強烈控訴啊!
希(半咸淡港式普通話讀呢只字) 望好快有續集……
正片
